हेलम्बु –५ उर्लेनीमा पहिरो जादा २१ घर उच्च जोखिममा ,कष्टपूर्ण दैनिकी बिताउदै स्थानिय

भदौ १४— गत साउन २७ गते सिन्धुपाल्चोकको हेलम्बु गाउँपालिका–५ उर्लेनीमा पहिरो जादा २१ घर उच्च जोखिममा छन् । तत्कालीन अवस्थामा ११ घरमात्रै जोखिममा रहे पनि पहिरोले आकार बढाएपछि थप १० घरसहित अहिले २१ घर उच्च जोखिममा रहेको पहिरो प्रभावित कान्छामान तामाङले बताउनुभयो ।

हेलम्बु गाउँपालिकाले उपलब्ध गराएको टेण्टमा उनिहरु अहिले बसेका छन् । तर प्रभावितले कष्टपूर्ण दैनिकी बिताइरहनुपरेको गुनासो गरेका छन् । पहिरो गएलगत्तै वडा कार्यालय र गाउँपालिकाले त्रिपाल, टेण्टलगायतका सामग्री उपलब्ध गराएको थियो । तत्कालै अन्यत्र सरेर बसेका प्रभावित स्थायी रूपमै स्थानान्तरण हुन चाहन्छन् ।

उर्लेनीको बिसौनीबाट साप्रेसम्म करिब पाँच सय मिटर लामो पहिरो खस्दा त्यहाँका नागरिकको जनजीवन कष्टकर बनेको हो । सिंगो गाउँ नै पहिरोको जोखिममा रहेको प्रभावितको भनाई छ । पहिरोले बस्तीमात्र होइन, तालामाराङ खोला आसपासका सयौँ रोपनी खेतीयोग्य जमिनसमेत जोखिममा छन् ।

हेलम्बु गाउँपालिका–५ मा पहिरो गएपछि दैनिक खोला बाढी आउने र मेलम्ची नगरपालिका–६ का नदीतटीय क्षेत्रका खेत धमाधम कटान भइरहेको स्थानीय सानोकान्छा तामाङले बताउनुभयो । यसका कारण केही बस्ती र खेतीयोग्य जमिन थप उच्च जोखिममा देखिएका छन् । पहिरो प्रभावितसँग निरन्तर सम्पर्कमा रहेको बताउँदै वडाध्यक्ष दीपकुमार तामाङले प्रभावितको माग र आवश्यकताका आधारमा गाउँपालिका र अन्य निकायसँग स्थानान्तरणसँगै स्थायी आवास निमार्णका लागि पहल गर्ने बताउनुभयो । पहिरोको जोखिम कायममै रहेकाले आवश्यक सतर्कता अपनाउन गाउँपालिकाले स्थानियलाई आग्रह गरेको छ ।