कालिज शिकार गर्न गएका एक युवकको मृत्यु

सिन्धुपाल्चोक ,१७ मङ्सिर

कालिज शिकार गर्न गएका एक युवकको मृत्यु भएको छ ।चौतारा साँगाचोकगढी नगरपालिका वडा न ३ का १८ वर्षिय फूलकाजी तामाङको घटनास्थालमै मृत्यु भएको हो । शनिबार बेलुकी आठ बजे कालिज शिकार गर्न मृतक तामाङ र उनको १५ वर्षिय भाई भाइराजा तामाङ स्थानीय जंगल ललायी पाखामा गएका थिए । जिल्ला प्रहरी कार्यालय सिन्धुपाल्चोकका अनुसार बारुद र हलीको फाली लगायत घरेलु सामाग्रीद्वारा आफैले तयार गरेको स्थानीय बरुवा बन्दुका बोकेर उनीहरु कालिज शिकार गर्न गएका थिए ।

कालिजलाई गोली हान्ने  क्रममा व्याक फायर भएर तामाङको मृत्यु भएको प्रहरी नायव निरीक्षक निरञ्जन भट्टराइले जानकारी दिनुभयो । डिएपी भट्टराइका अनुसार शिकार गर्न सँगै गएका मृतक तामाङका भाइ भाइराजा भने सकुसल रहेका छन् भने  मृतक तामाङको जिल्ला अस्पताल चौतारामा पोष्टमार्टम हुने क्रम जारी छ ।