पञ्चकन्या नवप्रतिभा युवा क्लब ए टिम विजयी

सिन्धुपाल्चोक । चौतारा स्पोर्टिङ क्लबद्वारा आयोजित खुल्ला सेभेन ए साइड फुटबल टुर्नामेन्ट २०८१ मा पञ्चकन्या नव प्रतिभा युवा क्लब ए टिम विजयी भएको छ । मंगलबार भएको फाइनल खेलमा पञ्चकन्या नव प्रतिभा युवा क्लब बी टिमलाई शून्यको विरुद्ध १ गोल गर्दै ए टिम विजेता हुन सफल भएको हो ।

चौतारा साँगाचोक गढी नगरपालिका ७ मेलचौर स्थित दरबार डाँडामा भएको सो फुटबल प्रतियोगितामा कदमबासका दुई युवा क्लवबीच रोमाञ्चक प्रतिस्पर्धा भएको हो । गत भदौ २२ गतेबाट सुरु भएको प्रतियोगितामा १४ टिमले सहभागी जनाएका थिए । खेलको पहिलो हाफमा १ गोल गरी विजेता बनेका ए समुहले रु ६० हजार, शिल्ड, मेडल र प्रमाणपत्र प्राप्त गरेका छन् । उपविजेता समुह बि ले रु ३० हजार, शिल्ड, मेडल र प्रमाणपत्र पाएका छन् ।

विजेता तथा उपविजेता समुहका खेलाडीहरुलाई चौतारा साँगाचोकगढी नगरपालिकाको मेयर कृष्ण प्रसाद सापकोटा, उपप्रमुख सीता थापा, वडाध्यक्षहरु शिव श्रेष्ठ, राम प्रसाद गौतम, बिमल श्रेष्ठ र खेलकुद विकास समिति सिन्धुपाल्चोकका अध्यक्ष राम कृष्ण दंगाल, फुटबल संघका अध्यक्ष अमृत श्रेष्ठ लगायतले पुरस्कार, मेडल वितरण गरेका थिए । साथै आयोजकले उत्कृष्ट खेलाडी, डिफेन्डर, किपर लगायतका खेलाडीहरुलाई हौसला स्वरुप मायाको चिनो प्रदान गरिएको थियो ।

फाइनल खेलमा पुग्नुभएका मेयर सापकोटाले खेल क्षेत्र र खेलाडीको विकासका लागि नगरपालिका सधै तयार रहेको बताए । आयोजक तथा खेलाडीलाई हौसला दिदै मेयर सापकोटाले शुभकामना ब्यक्त गरेका थिए ।

यसैगरी कार्यक्रममा खेलकुद विकास समिति सिन्धुपाल्चोकका अध्यक्ष राम कृष्ण दंगालले शुभकामना मन्तब्य राख्दै खेलकुद गतिविधिलाई चलायमान बनाउन फुटसलको प्रबन्ध मिलाउँदै गरेको जानकारी दिए ।