जुगल खबर
प्रादेशिक अस्पताल चौतारा अस्पतालमा आँखा उपचार र मानसिक स्वास्थ्य तथा नसर्ने रोग परामर्श सेवा सुचारु गरिएको छ ।
सोमबार वागमती प्रदेशका स्वास्थ्य मन्त्री किरण थापा मगरले आँखा उपचार शाखा र मानसिक स्वास्थ्य तथा नसर्ने रोग परामर्श कक्षको उद्घाटन गरेका हुन ।
यस अस्पतालको सुविधा सम्पन्न भवन बने संगै सेवाहरु पनि विस्तारै थप हुदै गइरहेको छ । अस्पतालले गत असोजदेखि डायलासिसको सेवा समेत सुरु गरिसकेको छ । थप नयाँ सेवा आँखा उपचार शाखा र मानसिक स्वास्थ्य तथा नसर्ने रोग परामर्श सेवा पनि सुरु गरेको निमित्त मेडिकल सुपरिटेन्डेन्ट डा. रुद्रमणि भण्डारीले बताए ।
जिल्लामा स्वास्थ्य, शिक्षा तथा खेलकुदका सन्दर्भमा पुर्वाधार विकास संगै विभिन्न सेवाहरुको सकारात्मक विकास भएको पुर्वमन्त्री युवाराज दुलालले बताए । उनले दिनेश राम्जी बहुप्राविधिकमा फार्मेसी पढाइको सुरुवात गरे संगै यस अस्पतालसंग सहकार्य गरेर अगाडि बढाउने योजनाहरु रहेको बताए ।
चौतारा साँगाचोकगढी नगरपालिका मेयर कृष्ण प्रसाद सापकोटाले चौतारा अस्पताल सुत्केरी र अन्य रोगका लागि रगत चाहिने विरामी र आफन्तहरुले समस्या भोग्नुपरेको प्रति आफु गम्भिर रहेको बताउदै ब्लड बैंक संचालनको लागि आवस्यक कर्मचारीको ब्यवस्थापन गर्न नगरपालिका तयार रहेको बताए ।
प्रतिक्रिया दिनुहोस्